Utoqqaat utoqqaat angerlarsimaffiini najugaqaraangamik paaqqutarinninnermik suliaqartunit ulluinnarni ikiorneqarnissartik pinngitsoorsinnaanngilaat. Utoqqaat angerlarsimaffiini najugaqartut assigiinngitsunik salliutitaqarlutillu inuttut soqutigisaqarlutillu atassuteqarfeqarlutik ataatsimoorussaat tassaavoq, inuunerup pitsaassusianik misigisartagaannut utoqqaat angerlarsimaffiata ingerlanneqarnera aamma naleqartitai kiisalu paaqqutarinninnermik suliaqartut ataasiakkaat aamma aqutsisut apeqqutaasarmata.
Kalaallit Nunaanni sumiiffinni assigiinngitsuni utoqqaat angerlarsimaffiisa akornanni atortutigut atukkat aamma ilinniagaqarsimasunik sulisussarsinissamik periarfissat assigiinngitsorujussuupput.
Siunertaq
Misissuinermut matumunnga siunertarineqartoq tassaavoq, utoqqaat angerlarsimaffiini aqutsisut, paaqqutarinninnermik suliaqartut aamma utoqqaat angerlarsimaffiini najugallit inuunerup pitsaassusianik paasinninnerat qanoq ittuunersoq, aamma ineqartut Kalaallit Nunaanni utoqqaat angerlarsimaffiini pitsaasumik isumaqarluartumillu inuuneqarnissaannut periarfissaannik pitsaanerulersitsiniarluni qanoq sulisoqartarnersoq misissussallugu.
Periuseq
Utoqqaat angerlarsimaffiini aqutsisut, paaqqutarinninnermik suliaqartut aamma utoqqaat angerlarsimaffiini najuqartut katillugit 43-t, utoqqaat angerlarsimaffiinit 18-ineersut, sammisat assigiinngitsut, tassunga ilanngullugit ineqartut inuunerisa pitsaassusiat aamma utoqqaat angerlarsimaffiini naleqartitat aamma isumalluutit pillugit apersorneqarput. Ineqartut ilaat ataatsimoortillugit apersorneqarput, amerlanerit ataasiakkaarlugit apersorneqarlutik.
Suliniutip ingerlanneqarfissaatut piffissaliussaq, aamma tamanut saqqummiunneqarnissaanut piffissaliussaasimasinnaasoq
Nalunaarusiap tamanut saqqummiunneqarnera: oktobari 2022
Aningaasaleeqataasimasinnaasut
Isumaginninnermut, Suliffeqarnermut Nunamullu Namminermut Naalakkersuisoqarfik