Kalaallit Nunaanni meeqqat akornanni anigorneqarsinnaanngitsumik siulluuteqartarneq immikkut ittumik atugaasorujussuuvoq. Amerlasuutigut kalaallit meerartaasa siulluuteqarnerisa ingerlarngat sivisullutillu ajornakusoortuusarput, siutip igalaasartaata ajorunnaarsinneqarsinnaanngitsumik putoqalersimaneratigut aamma maqisarneratigut tusaasat annikillinerannik kinguneqartartumik. Tusaasaqarsinnaaneq meeqqap ingerlalluarnissaanut aamma ineriartorneranut pingaaruteqarpoq, aamma meeqqat tusaaniarnermikkut piffissami sivisunerusumi ajornartorsiuteqartarunik tamanna sakkortuumik kingunipiluuteqartissinnaavaat. Siusinnerusukkut misissuisarnerit takutippaat, meeqqat tusaaniarnermikkut ajornartorsiutillit akornanni inooqataanermi piginnaasat appasinnerunerannut, ilikkarniarnermi ajornartorsiuteqarnermut, atuarfimmi ingerlalluannginnermut, kiserliornermut, imminut naleqartinnerup appasinneruneranut, atuarfimmi assoroortitaasutut misigisimanerunermut, uippakajaarnermik misigisimanerup annertuneruneranut aamma misigissutsikkut ineriartornerup appasinneruneranut attuumassuteqartartoq.
Meeqqanut ajorunnaarsinneqarsinnaanngitsumik siulluutilinnut tusaasaqalernissamik passussineq tassaavoq tusartaat siutip tunuata saarnganut atassusigaq. Tusartaat siutip tunuata saarnganut atassusigaq siutip tunuaniittarpoq, softbandi (niaqqumut tasseq tusartaatitalik) atorlugu inissaminiitinneqartarluni. Siut maqigaangat tusartaatit nalinginnaasut atorneqarsinnaaneq ajorput. Immikkut ilisimasalinnik peqannginnera pissutigalugu Kalaallit Nunaanni meeqqat taama passunneqarnissamik neqeroorfigineqanngingajavipput.
Siunertaq
Suliniummi Nipilimmi anguniarneqartoq tassaavoq, periutsimik naleqquttumik ineriartortitsinissaq, taamaalillutik Kalaallit Nunaanni peqqinnissaqarfimmi aalajangersimasumik sulisut namminneq tusartaatit, telemedicini atorlugu Københavnimi immikkut ilisimasalinnit tapersersorneqarlutik, sumiiffimmi tunniussinnaasunngortillugit. Taamaaliornikkut meeqqat tusaaniarnermikkut ajornartorsiutillit pitsaanngitsumik kinguneqartitsinissaat pinngitsoortinneqarsinnaavoq. Tassa tusartaatit, telemedicini atorlugu naleqqussarneqarlutik sumiiffimmi tunniunneqarneranni suliniummi meeqqanut peqataasunut pitsaasumik sunniuteqassappata passussinerup Kalaallit Nunaanni peqqinnissaqarfimmut eqqunneqarnissaanut suliniut alloriarnerusinnaavoq siulleq.
Suliniummi uagut suliassarput tassaavoq, meeqqat aamma taakku ilaqutaasa ulluinnarni inuunerminni tusartaatit qanoq atorneraat itisiliinikkut misissussallugu, meeqqat aamma taakku ilaqutaasa tusartaatinik atuerusussuseqarnerat aamma misigisaat, aamma atortuaannarneqarnissaannut aporfiusinnaasut paasisaqarfigiumallugit.
Periuseq
Meeqqat 22-t, siulluttarnertik pissutigalugu siutimikkut illuttut tusaaniarnermikkut ajornartorsiutillit, tusartaammik softbandimut (niaqqumut tasseq tusartaatitalik) imaluunniit nasamut ikkussamik neqeroorfigineqassapput.
Meeqqap tusartaammik atuinera malinnaaffigineqassaaq, ingerlaavartumik apersuinerit kiisalu telemedicini atorlugu immikkut ilisimasalimmut Københavnimeersumut nakorsiartitsinerit atorlugit. Aammattaaq apeqqutinik akisassianik suliaqartoqassaaq, tusartaatip atulernissaa sioqqullugu aamma kingorna meeqqap qanoq ingerlaneranik, inooqataaneranut pissutsinik aamma inuunerisa pitsaassusiannik misissuisoqassalluni.
Tamatuma saniatigut itisiliilluni misissuisoqassaaq, ilaqutariit pingasuniit arfinillit tikillugit amerlassusillit Nuup avataaneersut peqataanissaannut toqqarneqassallutik.
Nuummi ilaqutariit sisamat qaammatit pingasut missaannik akuttussisilimmik ilisimatusartunit marloriarlutik apersorneqarusuttut toqqarneqassapput.
Suliniutip ingerlanneqarfissaatut piffissaliussaq, aamma tamanut saqqummiunneqarnissaanut piffissaliussaasimasinnaasoq
2023-p ukiaanerani
Suleqatigineqarsimasinnaasut
Siutikkut-qinngakkut-toqqusaakkut nappaatilinnut immikkoortortaq, Dronning Ingridip Napparsimmavissua, Nuuk
Center for Hørelse og Balance, Rigshospitalet København
Dronning Ingridip Peqqissaavia, Nuuk
Aningaasaleeqataasimasinnaasut
Itisiliilluni misissuinertaa Karen Elise Jensens Fondimit taperserneqarpoq